Blog 首頁 全部文章 【300呎以下新樓盤巡禮】全港10大熱門 納米盤 (2017年夏)

【300呎以下新樓盤巡禮】全港10大熱門 納米盤 (2017年夏)

admin

隨住香港樓價愈來愈貴,近年300呎以下嘅蚊型盤「納米盤」數量激增。雖然居住面積唔大,但總算助唔少市民一圓上車夢。Boxful為大家選出近期熱門嘅10大 納米盤 ,立即睇下邊個最啱你心水!

 

1)匯璽 Cullinan West

新地旗下嘅西南九龍匯璽共提供約3,400伙,當中開放式單位面積最細為267呎。根據匯璽官網價單顯示,270呎單位嘅售價為$640萬至$710萬左右,平均呎價為$2.3萬至$2.6萬。

西南九龍匯璽位於港鐵南昌站上蓋,坐擁西鐵同東涌綫雙鐵優勢,無論要出新界九龍定入港島大嶼山都相當方便。匯璽仲自設近30萬呎商場,購物、餐飲和消閒一應俱全,而旗下會所則提供泳池、健身室、瑜伽場地、宴會廳同燒烤場等運動康樂設施。

地址:大角咀深旺道28號

 

2)薈晴 The Met. Bliss

薈晴The Met.Bliss提供364伙,其中180伙為標準開放式單位,標準單位實用面積位為219呎至238呎,戶戶均配有22呎露台,平均呎價為$1.5萬至$1.7萬。薈晴設有會所,為住客提供泳池、健身室同宴會廳等康樂設施。

薈晴距離港鐵馬鞍山站約10分鐘步程,環境清靜,附近有馬鞍山公共圖書館同體育館,如果想出街食飯或行街睇戲,亦可以去馬鞍山站上蓋嘅新港城中心同馬鞍山廣場。

地址:馬鞍山恆光街15號

 

3)豐寓 Edition 178

位於葵涌嘅豐寓屬單幢式設計,共提供136伙,8成為開放式或1房間隔單位,當中有唔少實用面積222呎至275呎嘅細單位,售價為$356萬至$837萬,平均每平方呎價為$1.6萬至$1.8萬不等。

豐寓距離葵芳港鐡站只需6分鐘步程,方便就腳,又設有會所,提供超過2,000呎公用花園或遊樂地方。附近仲有新都會廣場同葵涌廣場等大型商場,又有運動場同葵青劇院等社區設施,如果想同家人親親大自然,最快只需10分鐘就可到金山郊野公園,康樂配套相當完善。

地址:葵涌興芳路178號

 

4)逸新 novi

預計2019年第4季落成嘅逸新(novi),位於九龍基隆街共提供138伙,標準單位實用面積為157呎至312呎,間隔主要以開放式同1房2廳(連套房)為主,部分單位設有露台同工作平台。樓價為$540萬至$590萬左右,平均呎價為$1.7萬至$2萬。

逸新臨近港鐵太子站,亦有多條巴士、小巴路線,交通便利。雖然逸新不設會所,但屋苑附近有多個公眾遊樂場同公園,康樂設施頗齊全。

地址:九龍基隆街50號

 

5)菁雋 T Plus

預計2018年9月落成嘅菁雋,一推出就引起全城熱話,事關菁雋擁有現時新盤市場中最細面積嘅128呎單位,比標準私家車停車位更細。其實菁雋一共提供356伙,其中近8成單位實用面積為200呎以下(128呎至178呎)嘅「納米單位」,以開放式間隔為主,至於227呎至247呎嘅單位則為1房間隔,適合年輕單身嘅上車一族。

菁雋臨近景峰輕鐵站,距離屯門同兆康港鐵站只係7分鐘車程,算相當便利。而且屋宇基座設有會所同3層商場,而地庫則提供52個車位。屋苑附近亦有唔少商店同食肆,生活起居方便。

地址:屯門青棉徑2號

 

6)西營盤 AVA 128

西營盤AVA 128係由資深投資者盧華發展嘅單幢樓系列「AVA」其中一個住宅項目,共提供63伙,全為開放式間隔,實用面積由177呎起至296呎,仲設有22呎露台,而A室同C室仲另設有16呎工作平台。項目售價由$460萬起至$670萬不等,計番實用呎價大約係$2.1萬至2.7萬左右。

西營盤AVA 128設有近千呎嘅住客會所,提供健身室同遊樂場等康樂設施。交通方面,樓宇毗鄰港鐵西營盤站同上環站,出入中上環商業區相當便利,而且位於中西區校網,有英皇、聖保羅同聖士提反等名牌中、小學校,相信對關心子女升學問題嘅家長嚟講有一定吸引力。

地址:香港德輔道西124-128號

 

7)薈蕎 The Met. Acappella

沙田薈蕎(The Met. Acappella)係主打細單位嘅單幢式住宅大廈,共提供336伙,主要為開放式同1房戶。其中開放式單位實用面積由約200呎起至300呎。

沙田薈蕎鄰近港鐵大圍站,出入市中心亦有多條巴士同小巴線。生活配套同設施方面,項目本身設有會所,提供泳池、健身房、瑜伽室、桑拿室、燒烤場同宴會廳等,附近又有文化博物館同體育館,康樂設施完善;再加上區內多個大型商場、超市同食肆等,可滿足住客日常所需。

地址:沙田大埔公路大圍地段7838號

 

8)63 Pokfulam

63 Pokfulam全盤共提供350伙,大部分為實用面積269呎至318呎嘅納米單位,樓價為$639萬至$1,711萬不等,平均呎價高達$2.9萬至$3.3萬。

63 Pokfulam設有24小時開放嘅會所Club Chrysoberyl,提供健身室、虛擬實境單車競賽系統等康樂設施,其中會所仲特別設置專業禮賓師打理住客生活,好似家務助理、家居清潔同餐飲宴會等。此外,項目距離港鐡香港大學站只係幾分鐘路程,附近亦有多條小巴、巴士同電車路線,出入港島極為方便。

地址:薄扶林道63號

 

9)Monterey

Monterey共有8座分層住宅大樓同22幢獨立洋房,提供926個住宅單位,其中實用面積最細嘅單位為239呎,但另附有94呎平台;至於其他細單位實用面積為259呎至288呎不等。樓價由$480萬至$600萬不等,每平方呎價為$1.6萬至$2.3萬。

Monterey設有住客會所Club Monterey,面積高達4萬呎,提供泳池、健身室、室內運動場同兒童遊戲室等康樂設備,附近亦有單車館公園同運動場等社區設施同多座大型商場。交通方面,Monterey臨近港鐵將軍澳站,沿路亦有多條巴士同小巴路綫,出入市中心相當方便。

地址:將軍澳唐俊街23號

 

10)加多利軒 Seven Victory Avenue

何文田加多利軒共提供250伙,標準單位實用面積由161呎至390呎不等,部分樓層單位另設有22呎露台,平均呎價為$2.1萬至$2.4萬不等。

加多利軒臨近東鐵線旺角東站,行10分鐘左右步程,而亞皆老街沿線亦有多條巴士同小巴路線,交通可以話係四通八達。至於生活配套方面,項目於1樓設有住客會所,除咗泳池、健身室外,更有室內外公共花園。平日想出街食飯購物,行10至15分鐘左右就到新世紀廣場、朗豪坊、花園街、女人街等飲食、購物熱點。

地址:何文田勝利道7號

 

住得納米樓,就預咗家居收納空間會好有限,有乜解救?相信Boxful呢類新式儲存服務可以幫到你!假設你只需要小幫忙,要儲存嘅收藏品只係三幾箱,可以好好利用Boxful嘅迷你箱服務,逐箱計、冇咁貴!但如果你真係有好多好多物品,以至係大型收藏品,Boxful一樣有提供迷你倉服務!

即搵Boxful幫手

——

延伸閱讀:【儲存服務點揀好?】精明選擇 迷你倉 10大貼士

延伸閱讀:【趁暑假搞裝修】夏天 家居裝修 5大注意事項

緊貼Boxful BlogFacebook Page,獲取更多家居生活貼士!

更多相關文章