【家居雜物惹小強!】教你滅絕6大 家居害蟲

家中擺放大量雜物,不但令居住環境變得狹窄,更容易堆積塵垢,影響衛生,成為曱甴、螞蟻同塵蟎等昆蟲理想嘅藏身之處。唔想同各種昆蟲「共處一室」,家居衛生清潔一定要做到足。如果你屋企不幸出現 家居害蟲 ,就要記得留意以下嘅滅蟲對策!

 

1)曱甴

唔少人諗住家中只要不留食物殘渣,就唔會惹曱甴(蟑螂)。其實家中雜物多一樣會招惹曱甴!好似舊報紙、紙箱嘅纖維同澱粉質,不但會吸引曱甴,亦係佢哋躲藏嘅地方,所以想趕走家中曱甴,首先就要清理家中垃圾同雜物,做好家居衛生清潔!譬如用過嘅碗筷、抽油煙機、煮食爐同微波爐等煮食用具要徹底清潔,斷絕其食物來源。

而要殺滅小強,除咗可利用坊間嘅滅蟑螂誘餌,放喺牆角、地板或抽屜角落等曱甴常出沒嘅地方外,大家亦可自製曱甴藥餌同殺蟲水。專家教路,以梳打粉混糖(1:1),又或者用硼砂加入洋蔥、砂糖同奶粉,都可製作安全天然嘅藥餌;而番梘碎、洗頭水、洗衣粉或梘液以1:1比例混合熱水,噴於小強身上,可堵塞其腹部呼吸氣孔,導致窒息。

 

2)檐蛇

俗稱檐蛇嘅壁虎,鍾意喺雜物多嘅地方出沒,通常於牆上、壁櫃同屋內縫隙中活動。壁虎經常會於牆壁或物件上留下污漬同糞便,再加上爬蟲類嘅外型,的確嚇怕唔少人。不過,壁虎會捕食曱甴、飛蛾、蚊同螞蟻等昆蟲,亦甚少咬人,其實可以話係益蟲而非害蟲,冇必要對佢地趕盡殺絕。

如果真係想趕走家中壁虎,最重要都係定期清理雜物,保持家居清潔,可利用具黏性物料嘅捕蟲器(如曱甴屋),捕小蟲之餘仲可捉埋壁虎,一舉兩得!

 

3)衣魚

衣魚即係俗稱嘅書蟲,鍾意食含有澱粉、纖維、膠質、漿糊類或麻布類嘅物品,並留喺陰暗潮濕嘅地方,好似衣櫃同書本就係其最愛嘅藏身地點。衣魚雖然對人類健康無害,但蛀爛書籍嘅習性就為生活帶來不少滋擾。

其實只要將樟腦丸放喺書櫃同衣櫃中就可令衣蟲不敢靠近。不過最治本嘅方法都係定期整理翻動書籍、報章雜誌、櫥櫃同衣櫥等,同時利用抽濕機同除濕劑降低室內濕度防潮。

相關閱讀:【收納小貼士】 防潮 吸濕用品不可少

 

 4)螞蟻 

螞蟻鍾意匿藏於高溫高濕嘅環境,例如水槽、水管、廚房同洗手間等。如果發現家中有螞蟻,首先要清理家中食物殘渣,並將食物放置於密閉容器內,以免氣味招惹螞蟻。你亦可利用螞蟻討厭嘅氣味,如醋、香茅草油、薄荷油、玉桂、黑椒、辣椒、丁香粒等噴灑螞蟻出沒嘅地方,再喺門底、窗邊同牆邊等在螞蟻走過嘅地方撒上爽身粉,可以阻擋螞蟻通過,防止螞蟻靠近。你亦可以購買螞蟻粉筆等滅蟻產品消滅螞蟻。

 

5)白蟻

眾所周知,白蟻會蛀蝕建築物嘅木料結構裝潢、傢俱,甚至磚塊、水泥牆、電線同電纜。如果唔及時處理,嚴重嘅可破壞樓宇結構,令家居變成危樓。 

想殺死白蟻千萬不能用普通殺蟲水,因為部分白蟻聞到氣味會遷離至其他地方,反而令問題擴散至其他範圍。要有效驅除白蟻,一定要使用白蟻專用嘅藥水,最穩陣就係聘請防治白蟻嘅專家評估白蟻嘅侵蝕範圍,並搵出巢穴所在,以助徹底消滅白蟻。

 

6)塵蟎

肉眼幾乎睇唔到嘅塵蟎,生於溫暖潮濕嘅環境中,以人類或動物(貓、狗)嘅皮屑同毛髮為食糧,最常於寢具、窗簾、布造傢俬、毛公仔同毛毯中出沒。塵蟎係常見嘅致敏原,如果家人有哮喘、鼻敏感等症狀就要加倍小心。

對付塵蟎並唔難,只要注重家居衛生,保持環境乾爽,多吸塵,勤洗並定期更換寢具,便可把塵蟎拒諸門外。你亦可以利用60℃或以上嘅熱水清洗床單、被鋪、枕袋,又或者將毛公仔放入雪櫃6小時,針對塵蟎怕熱怕凍嘅弱點將其殺死。

 

講到底,想家中不見害蟲,首要任務係經常清潔收拾家居,唔好讓雜物積存家中。你都即刻動手執屋,將好少會用又唔捨得扔嘅物品儲存在Boxful,咁就一舉兩得、一勞永逸啦!

即搵Boxful幫手

——

延伸閱讀:【 儲物狂 不是 收藏家 】8條問題自我測試是否有 囤積病

延伸閱讀:【雜物多易鼻敏感】家居 空氣清新機 選購攻略

緊貼Boxful BlogFacebook Page,獲取更多家居生活貼士!

Leave a Reply

Your email address will not be published. Required fields are marked *