【 三軍收納法 】台灣收納達人廖心筠的收納心法

《收納幸福到你家:改變上百個台灣家庭的整理奇蹟》呢本書,可以話係台灣人嘅收納天書。作者廖心筠係台灣首位上門收納專家,亦係第一個收納教學專家,佢仲獲得日本Jalo生活規劃師一級認證。想了解佢最出名嘅「 三軍收納法 」,又唔想睇晒成本書?本文為你作簡要介紹。

整理收納4大步驟

整理收納要記住一個原則:依照「種類」而非「空間」。先將所有物品分成幾大項目:衣物、鞋、手袋、書、紀念品等等,由你最熟手一項開始,每次只處理一項,循序漸進會更有效率。

步驟1:集中處理

整理某一項物品,要將所有該項物品及同類物品自家中不同地方全部搵出來,集中去檢視,並開始篩選、分類、收納。如果唔先集中,就會有執漏嘢情況出現。

步驟2:過濾篩選

篩選過程要快、狠、準!簡單做法就係抽出唔要物品丟棄,只保留剩下物品。

步驟3:正確分類

問自己3個問題:「呢樣係乜」、「有幾常用」、「喺邊度用」。即係依物品類別、使用習慣、使用頻率去分類同收納。分類之後,可先用紙袋或籃子暫時裝起來,確定數量同體積後,再按需要購買合適收納盒或收納箱。

步驟4:歸位收納

幫物品搵一啲最適當又順手位置,要好容易就可以攞到,又唔會放到四圍都係。如果成日都搵唔到物品,好容易會重複購買。最成功收納,係你合埋眼都知道某樣嘢放喺邊。

 

整理收納4大實踐法

了解咗「整理收納4大步驟」之後,喺實則整理過程之中,可以善用以下「整理收納4大實踐法」,讓你喺有限空間之下發揮最大收納效益,無論乜嘢物品都適用!

第1法:三軍收納法

分類時,將物品分成「三軍」。「第一軍」係主力,即係經常使用或最愛嘅物品,要放喺最順手、最顯眼嘅位置;「第二軍」係後補,即係間中會用到嘅物品,可以放喺較高處或較冷門嘅位置。

至於「第三軍」即係暫時用唔到嘅季節性物品,又或者係已經好少用嘅「冷板櫈」物品,應該將佢哋裝箱入盒。尤其係「冷板櫈」物品,封箱後不妨貼上日期,如果3至6個月後都冇打開來用過,應該恨心將之棄掉。

第2法:中途之家

千萬唔好將雜物隨便放喺地上或床上,因為有咗第一包就好快就會有10包,不久之後就會堆積如山。建議要有一個「中途之家」專門放置暫時未得閒收納嘅雜物,例如一個籃或一個膠箱,作為「待分類區」。一放滿咗就要馬上將裏面嘅物品分類收納。

第3法:睇得見收納法

好好利用透明或半透明膠箱或收納盒,讓裏面嘅物品一目了然,即使數量多都一樣可以搵到,唔會太雜亂。小型收納盒可以集中放置飾物,大型嘅就可以放鞋放帽。另外,透明嘅膠收納袋亦相當有用,可裝載衣物、毛巾、床上用品、手袋等。抽屜式嘅收納籃,亦最適合收納衣物,易睇易攞。

第4法:直立式收納法

將經常穿着嘅衣物折疊成多士狀,以直立形式排好放入櫃桶或籃,一打開就各款顏色一目了然,適用於唔怕皺嘅Tee或褲。直立式收納又易睇又易攞,比起傳統上下堆疊法可以收納多一倍嘅衣物數量。

 

斷捨離5大技巧

如果你只識得收納,但不懂得「斷捨離」,到頭來都會堆到一屋「垃圾」。好多都市人嘅收納問題,就係源於唔識丟棄物品;丟棄物品其實係所有步驟嘅第一步,假如唔丟棄物品,就咁整理同收納,只會白費功夫。「斷捨離」並唔容易,不妨放下情緒,試試呢啲技巧:

技巧1:快問快答法

拎起兩件類似嘅物品,好快咁問自己:「仲要呢件嘢嗎?」「咁嗰件呢?」一決定之後,即刻再換另外兩件物品。唔使諗太多,用最快嘅直覺去判斷自己嘅需求。

如果決定唔到,就自問:「上次用呢樣嘢係幾時?最近定係上年?」好少用到嘅話就唔要。

技巧2:以人為主軸

好多人收納失敗,係因為被物品反客為主。應該以人為主軸,用自己嘅角度出發去看待物品。應該係「我仲會唔會用呢樣嘢」,而唔係「呢樣嘢仲可以用」。如果以物品角度出發,咁每件物品都有存在理由,一定捨棄唔到。要記住,你只要唔用佢,佢就再冇存在意義,只係一件雜物。

技巧3:關鍵字「但係」

好多人執拾衣物都會發現,經常穿着嘅永遠只係嗰幾件,反而唔着嘅仲佔咗衣櫃大部分空間。其實,你應該將好少着嘅衫逐一檢視,講出唔着嘅原因,只要出現「但係」呢個詞,就可以掉咗佢!

例如:「呢件衫好貴,但係過咗時」;「呢件好好睇,但係我着起來有少少肥」;「呢件係阿媽送嘅,但係我麻麻地鍾意」……只要一有「但係」兩個字,就可以將之放棄。過濾之後,最完美嘅衣櫃就會出現,裏面留低嘅都係你最鍾意、最舒服、最常穿着嘅衫。

技巧4:過期即丟

各式各類嘅過期物品,包括:食品、藥品、調味品、補品、雜誌等等,不但靜悄悄累積,佔據家居空間,仲有可能影響家人健康。唔使多諗,過期物品一律丟棄。

技巧5:藉以減量,學會珍惜

我哋成日覺得孩子們太多玩具,難以收拾,正正係因為佢哋擁有太多,已經超出佢哋能力可以控制嘅範圍。作為父母不妨幫幫子女,有殘破或者有缺件嘅玩具,先行淘汰。同時亦應考慮減量,追求多種類但不要追求多數量,讓孩子學習珍惜。

 

如果你都係一屋雜物,又唔知點去處理,相信廖心筠嘅方法係值得你去參考。若然你執屋遇到有空間不足問題,Boxful可以幫到你喎!無論你只係需要一個箱嘅額外空間,抑或你需要多個儲物房,Boxful唔同嘅Plan總有一樣啱你用,即刻睇睇啦!

即按了解Boxful服務

——

延伸閱讀:關於家居收納的 10本好書

延伸閱讀:【生活專訪】3位 收納達人 的執屋貼士

緊貼Boxful BlogFacebook Page,獲取更多家居生活貼士!

Leave a Reply

Your email address will not be published. Required fields are marked *